Ivan Leung : 毫無道理   理所當然   然後怎樣?

分享

作者 : Ivan Leung ,喜歡音樂、教學培訓、投資、寫文章,熱愛探索新事物,保留著對世界的好奇心。

毫無道理   理所當然   然後怎樣?

唔理質素,只求交數。做生意,講道義;做人,講禮儀。宜家,有無問題?有so定無so先?你同個客做足pitch,三次又三次。但係最終,佢亦都偷足你條橋。之後,又唔判返畀你做。你有份做,不過叫白做,一蚊都收唔到,你可以點。你同Mary由認識到出街,再由送禮到去旅行,由睇戲到睇演唱會由kate spade到LV,由食french window到去咗France呢度,四個月,足足成四個月,連世界盃都踢完嘞,但係你連個波皮都掂唔到,16強都入唔到呀,你可以點吖?

哈哈,我求其打個電話之嘛,排google頭版廣告有個做production house嘅傻佬,竟然上咗嚟畀咗幾條免費橋嚟啊。嘩,勁正呀,真高質,連我同我老板都諗唔到呀!最緊要,竟然係免費呢!嘻嘻,我求其發個message之嘛,排係happn第三個嘅傻仔,竟然約我出街呀!又帶我睇戲、又帶我食好嘢,仲送禮物畀我,同我去巴黎𠻹呀!最緊要,竟然係免費呢,全包呀!真係爽呢!

毫無道理?噢,唔係啦!理所當然啦!因為,你要明白,多你一個唔多,少你一個唔少。其實,你咩都唔係。Vendor?對唔住,你唔係。男朋友,對唔住,你都唔係。你哋只不過係個資源供應者,你畀嘢我咪要囉,唔畀足我咪走囉!不主動、不抗拒、不拒絕。永遠唔好高估你喺人哋心目中嘅位置。無價值,你咪死開啲囉!無錯,你是你本身的傳奇,個問題係,你並唔係其他人嘅傳奇呢,將來老尷嘅,都只會是你。 你是你本身的傳奇,係無錯,不過,阿Q精神啲吧!你估你係雷軍咩,佢就的的確確係傳奇嘞!睇住嘞,雷軍只係小前鋒,有任務嘅小傳奇。之後嗰啲,先係真真正正嘅大傳奇呀。唔,估吓先?佢哋應該係姓馬嘅。

你就嚟結婚嘞。老婆靚,身材正,體貼又細心,所以你好開心。你好努力工作,買咗個單位仔,長沙灣青山道,搞緊mortgage,開始裝修,仲搵緊啲相熟嘅interior designer幫你手。你宜家企咗係旺角道,睇緊揀用邊隻磚嚟做個廚房地板,突然收到個message,你未婚妻話想同你分手,同你性格唔夾,你老母好煩,之前唔係你話會改都唔會信多你一次!所以,今晚出嚟要交待一下。What?單日轉向?今朝都仲升緊成四百幾點,下午兩點鐘出單嘢話大陸出招應對美國貿易戰?唔買波音機?禁蘋果入口?所有美國農產品停售?嘩嘩嘩,OMG!WTF!幾分鐘跌咗成千六點,加埋成兩千點來回呀!於是,你早咗成個鐘出到嚟,企住尖沙咀地鐵站R出口嗰個欄杆位,心諗,「點解會係我?」終於,你發咗呆成個鐘,諗緊呢個超難答嘅哲學問題。你未婚妻出現,oh sorry,早一日都仲係嘅。宜家,叫「曾經」未婚妻。見到我,佢由遠處慢慢走咗過嚟,喺我耳邊講咗幾句,然後,放低左條匙,就離開咗嘞。我企咗係原位,諗起呢四年幾嘅經歷,有起有跌,宜家個結果,係亳無道理?定理所當然呢?你又諗起,世界盃決賽,克羅地亞出盡力咁踢,最後都係輸咗。小米上市好努力咁托住,之後都好似同幻想仲有啲距離。你打到個電話差唔多爆,個keyboard比你打到爛,都係買唔到黃子華棟篤笑嘅飛。但係,網上黃牛兩千五蚊,係有得賣嘅。你先發覺,有啲嘢,唔到你話想點就點,想用咩方法就可用咩方法達到呀!

然後,你問,然後,可以怎樣?無吖,咪面對現實囉!唔通你走去痛打嗰個唔肯比錢嘅客,搵你溝唔到嘅女仔回水,叫雷軍同你認錯呀?面對現實啦你,你係邊個啫?

 

 

分享