作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
從CCASS券商持股洞悉倍數股（二）
首先又係認屎認屁時間，筆者早兩期在5.96推介過嘅華誼兄弟（300027.SZ）已升至6.58收市，筆者估計華誼股價將會繼續一路向北，原因係華誼兄弟已經揸住成手好牌，包括有近日開幕嘅蘇州華誼電影世界，模式類近迪士尼同埋環球影城，以華誼兄弟出品電影作核心主題。另外之前都有提及過未來兩年將有多部爆款猛片上映，最新的有本周嘅華誼兄弟自家開發IP《耿仁傑之四大天王》。
搵少咗 勁後悔
雖然個市繼續唔係太好，但筆者身邊朋友最近都搵唔少，就好似隻中昌國際控股（00859）咁，上周四（7月19日）由1.25元暴跌至0.26元，同我一樣有做開功課嘅阿活就二話不說，見個市值得番3億幾元就大膽掃貨，理由係佢間公司喺渣甸街啲物業都N個億啦，仲未計佢個主版殼價，加上間公司負債又唔多。講真，真係諗唔到唔買嘅理由，於是阿活發咗個小財，筆者就因為急屎去咗廁所而無買到勁後悔，呢篤屎真係超級貴！
來頭唔細嘅股
上周講隻布萊克萬礦業（00159）入監察名單，點解特別要再講佢呢，原因就係佢個大股東桂四海來頭唔細，係香港遠航集團董事長，有香港船王之稱。呢位富豪資產過百億，除咗老本行航運之外，個人投資亦涉足酒店、房地產市場，單單喺佢鄉下安徽項目投資額已20億元。有時除咗網上睇一個老闆背景之餘，都要查下揸過邊間公司股票，亦可以從中得知佢有痴埋佢邊一路人馬。重點就係只要大家上聯交所DI CHECK下（DI指Disclosure of Interest）就會發現桂四海之前在2011年9月7日增持亞洲電訊媒體（00376）1,300萬股，亞洲電訊媒體其後改名瑞東集團、再改名至現在的雲鋒金融。當時雲鋒金融已經係殼王高振順主理，即係桂生疑似做「頭」幫手坐貨，當時呢批貨嘅配售價為3元，之後高生賣盤畀雲鋒基金時個股價曾一度打高至25元。第二點值得留意係布萊克萬礦業副主席兼非執行董事劉珍貴先生在2011年曾經擔任雲鋒金融之獨立非執行董事。
除咗布萊克萬礦業有機會係黑馬之外，桂生剛剛上市嘅另一隻創業版股票遠航港口（08502）都不容忽視，上市以下限0.38元定價，個市咁差都可以連升七個交易日至0.57元，升幅高達50%，等佢慢慢回返落去加上成交縮時大家就可以諗諗佢喇。
預告筆者愛股華誼騰訊娛樂（00419）將會於9月份重返深港通標的，下期再談。
【權益披露：本人持有華誼騰訊娛樂股份】
Facebook 專頁：財技戲法
