作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
腦細GG咗 加快兼加大賣殼機會
記得三個月前筆者都有寫過CEC國際控股（00759）有潛在賣殼可能，執筆之時（8月18日）公司主席兼大股東林偉駿先生離世，首先大股東或者老闆GG咗通常都會「升一浸」，因為批出去俾人維持秩序嘅貨無人對數，再者呢啲每個月都會派下「糖」不斷燒錢，既然無糖派，不如將隻嘢嘅股價打高佢散，又可以收回成本兼有賺。另外，CEC國際近幾年都係不斷錄得虧損，加上公司有不少負債，林老闆一仔一女剛剛畢業都未必能夠接得穩呢個爛攤子，最直接了當就梗係無眼屎乾淨盲賣咗佢就唔洗頭痕，不過要賣都唔係咁簡單嘅事，跟住落嚟都係要執好間公司先，如果唔係點賣個靚價呢？睇嚟都係博炒一轉上去沽晒佢，之後食下花生好喇。
由於呢篇文拖到周二（8月21日）先交稿，筆者見證CEC國際復牌，然後暴升上最高位1.04元，聽聞某財演仲「乜風」話唔會炒㖭，咪花幾秒時間恥笑下佢囉。爆升原因有兩個，第一就係負責維持秩序班人拎住手貨，死無對證之下就可以打去佢散，情況就好似當年中國金融租賃（02312）老闆Timo咁，GG咗之後股價就直線飛天，第二個原因就係市場憧憬賣殼，加上個「無品360」口賤臭格抽水怪腦細林乜鋒出口術話10億元樓下有意收購759嘛，出事前都係3億元左右，咁啲人有數計嘅，咪狗衝入去炒囉，不過炒還炒最後都要諗下諗實質可行性，人哋屍骨都未寒，仲要遺產分配都要搞一輪，就算賣都起碼等一段時間啦。
認住呢隻影視股要避一避
其他影視股筆者都唔會介意推介人買，但有一隻就第一時間通知所有朋友唔掂得，呢隻就係邵氏兄弟控股（00953）。唔係本身隻股唔得，而係呢隻股票已被某經紀行嘅某經紀買到一褲都係，呢個人仲要每日左右兩邊排晒盤，總次就右邊沽到幾多貨就即時擺返左邊食一格買返，筆者觀察好耐而有一年半多，呢個牌（唔開名啦，已勸佢多次唔聽）由1元買到而家0.4元樓下，假設佢有天大本事食多十幾轉格仔，成本起碼都要0.8元，即係帳面計輸近一半！除此之外，呢個倉仲要借爆晒孖展（大概兩百幾萬元買八百幾九百萬貨），相信大家最近都見識過啲孖展斬倉嘅威力㗎啦，間公司唔係無人睇場，佢日日當黎瑞剛係傻逼咁左右兩邊擺行牌食格仔，你估人哋唔會查佢咩？假設有心人嬲起上嚟，真係會先殺個價落去洗爆佢個倉。
【權益披露：本人沒持有上述股份】
Facebook 專頁：財技戲法
