Sammy : 押股借錢都唔係咁易 (二)

4240R-6413
分享

作者 : Sammy,畢業於英國赫德斯菲爾德大學工商管理學系。曾為職業魔術師及婚禮司儀,現以財技角度切入分析股票,破解莊家的障眼法。

押股借錢都唔係咁易 (二)

大市不斷下行,反彈無力,而且出面無論大陸或香港都係非常水緊,上回講到上市公司大股東押股借錢都絕非易事,事實擺在眼前亦是如此。最近筆者已收到五宗以上的搵借錢「畸屎」,介乎借一千萬元至幾億元都有,但全部都係得個問字,無一單成事。例如借一兩千萬嘅附加其他生意當係一個Package咁做,勉強都會借俾佢,但好多都係去Shopping咁逐間格價,務求格到至抵價錢先做,呢啲客問完一次佢唔借,第二次肯定唔會借俾佢,因為明顯出面搵匀全行都無人借佢先「死死地氣」返轉頭;另一邊廂市值夠想借幾億錢嘅公司好多都係打大個市值去借錢,睇返盤數佢啲實質資產都係渣渣,同埋幅圖睇落明顯係最近先踢高個價,加上監管機構最近收緊券商孖展融資,無番五六億元閒置資金都好難借兩三億元出街。

有時我哋財技分析派都只係從上市通告著手,去從公司資產、股權集中度、財技動機去評估間公司值博率有幾高,其實好多時我哋只能估到大概方向,真正入面班人嘅情況都係一無所知。就以一例,好友T君曾經彈過一隻佢收費專欄有推介過暗手賣殼嘅股票「冧靶」予筆者,當時計至高位都有五成升幅,之後股回落至之前再低三成。點解攞返出來講呢,原來呢個新主本身都未收夠貨,要在出面撲水做全購,但自己手貨原來已經抵押咗,結果呢個新主搵到另一間上市公司老闆幫佢押股借錢,可能私底下認識,如果唔係根本唔會睇得出兩間公司係有關係。

慎防資金鏈斷裂

依家咁嘅環境,做經紀嘅梗係希望個客炒多幾轉,孖展做得幾多得幾多,但現時筆者都係會勸啲客盡量短炒有得食就食,孖展融資部分盡量食糊減少,就好似筆者團隊最近同大陸公司老闆有合作,錢到就幫手開工,呢啲嘢其實一早DEAL好晒,但竟然無啦啦會搵啲藉口推三推四「無糖派」,或者係啲「糖」要遲啲先到,講到尾都係「水緊」。唔好睇少呢樣嘢,一間上市公司水緊隨時會波及其他同系股票,或者保證金融資連環斬倉危機,因為好多「玩家」都唔係攞真金白銀去炒股票,通常都係用手貨去攞個額再「按上按」,當然要畀貴息啦,至於其中一隻唔掂,三個字:冚包散。

【權益披露:本人沒持有上述股份】

Facebook 專頁:財技戲法

分享