作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
大市唔就，有頭髮邊個想做熾哥？
大市由高位南下已經差唔多7,000點，正常都會諗有反彈，但身邊好多朋友都係唔敢博彈，反而係一彈就做淡倉睇淡居多，唉！正所謂有頭髮邊個想做熾哥（黃永幟，外號「幟哥」，香港著名廚師）吖？依家邊個一凸個頭出來就好似俾人鬥快扑傻瓜咁扑，加上貿易戰未搞掂，周圍都缺水，依家好多行家都叫苦連天，誇張嚟講幾乎係滴血止渴。
記得上年開始發生第一單趙薇同佢老公黃有龍被中證監罰款兼禁入A股市場，之後到今年年6月爆出娛樂圈高片酬偷稅漏稅，近期出政策打壓手游疑似變相挫騰訊（00700）銳氣，到今日馬雲決定退休去教書，其實諗返幾件事加埋一齊都幾得人驚，因為呢班人都係一個圈子私下老友鬼鬼，最後一單究竟係槍打出頭鳥還是馬生聞到味決定退落嚟呢？可能好多人都會覺得會唔會諗多咗，正如自古以來有天災發生，都係啲蛇蟲鼠蟻出晒來，打風前一定周地飛蟻，成個山頭都係蜻蜓一樣，遲啲可能有大事發生都唔奇。
最近約了好友T君出來下午茶，都係呻下嚟緊殼股無運行之類，反而T君又覺得注資又唔會太有難度，反正拆散幾次去注都係一樣，同埋依家好多都唔會行G.O.啦，要賣殼都係暗手賣。其實收緊賣殼、注資、養殼無疑係會淘汰咗一班人，以後成本只會越來越高，要睇公告做功課嘅資訊要夠多、財技上思維有所提升先能夠繼續生存落去。講到成本，做「交波隊」咁計，以前個指揮官搵晒啲大陸人開好晒啲人頭Account，之後上面就有人幫手搞掂，經紀基本上乜都唔洗做就可以拆佣；依家人頭戶口要自己搵，仲要搞埋啲雙重保安編碼，即係要增加你哋成本，而且唔可以喺大陸做，因為電話號碼係實名登記，筆者得知全部都要香港做，落柯打同埋接柯打嘅都係要用太空電話、太空卡、太空wifi同埋電腦，想搵啖食啫，都要準備好晒成套設備先有得開工都咪話唔煩。
今期推介普甜食品（01699），其實呢隻個價未上之前一早同T君講咗，雖然都升唔少上來，聽返來係話會大搞的，鐘意咪等佢回啲，睇位買少少博下囉，唔包生仔的。
【權益披露：本人沒持有上述股份】
FB專頁：財技戲法
