Sammy : 福建幫大佬嘅股票回歸

作者 : Sammy,畢業於英國赫德斯菲爾德大學工商管理學系。曾為職業魔術師及婚禮司儀,現以財技角度切入分析股票,破解莊家的障眼法。

福建幫大佬嘅股票回歸

個市無咩好炒,推邊隻就死邊隻。筆者一向鍾意周圍飲飲食食,話說有時無咩做筆者都會同女友返大陸食下嘢,我同佢都係火鍋控,老鴨湯、麻辣湯、日式shabu shabu、豬骨湯、雞煲類大部分都食均,依家就首先喺呢度推介大家一間大陸嘅火鍋店:潤園四季椰子雞鍋,呢間椰子雞鍋湯底主要係非常足料,用幾個椰青水去做,所以雞件就咁滾熟已經完美咁吸收咗椰青水嘅鮮甜味,再蘸上用醬油、薑末同埋柑桔汁組成嘅醬汁,百分百帶出土雞嘅鮮味。老老實實筆者排足90分鐘先有位(但食完會覺得值得),好在有微信叫號,呢樣嘢香港真係同大陸無得比,香港要指定下載一個排隊APP,大陸一個微信已經搞掂晒所有支付、等位、落單點餐,所以好多香港仔到今時今日仲自我感覺良好!哪裡來嘅底氣呢?

獨善其身嘅股票

由於個市仲係差到極點,基本上上周講嘅圓通速遞國際(06123),走勢上價位都係繼續陰跌,好多朋友因為跌得太深,想走都搵唔到位走;加貨嘅好多都係睇住佢個全購價4.0698元去加注,大家都諗住呢個價穿一成都見底啦,點知依家仲要比全購價南下三成幾。雖然好多股都係無限沉底,個市咁差大家不妨留意下一啲可以獨善其身嘅股票,記得N個月前筆者寫過一篇《福建幫大佬嘅股票》華隆金控(01682),佢改名前身係高銳中國物聯、福源集團控股。之前提到吳良好,佢個仔吳志龍及吳支華三個持有公司大部分股權,而且乾度十足,唯獨上次推介時是0.66元左右,之後上過一次0.8元樓上就一直陰跌至0.3元。最近個市勁差佢竟然可以由0.3元氣勢如虹咁係咁爬返上來0.75元,因為一向都係成交疏落,但近日上到呢個價位買沽都「齊盤」值得再度留意下,加上國慶假期後公司公布全資附屬WFOE與OPCO及中國股權擁有人(持有OPCO全部股權的支氏控股及俞曉玲)訂立VIE(變權益實體,即投資者持有並非基於過半數投票權的控股權益之實體(投資對象))協議。透過VIE協議,WFOE將可實際控制OPCO的財務及營運,並享有OPCO產生的全部經濟利益及得益。訂立VIE協議後,OPCO的財務業績將併入該集團的綜合財務報表內,而OPCO將為公司全資附屬公司。OPCO的主要業務為P2P融資,以網絡借貸信息中介機構經營。呢間OPCO由支氏控股持有90%,俞女士持有10%;同時支氏控股由支華先生同佢老婆俞女士分別持60%及40%,講到尾又係夾埋自己友做世界,做咩都好都係搵個藉口炒股票啫。

現價0.75元,對上一次全購價係0.93元,又曾經以0.7元配售過接近兩成畀吳良好,個市咁鬼弱雞都郁,似乎有啲料到,話晒福建幫只要搵多幾個同鄉幫下手唔難嘅。

【權益披露:本人沒持有上述股份】

Facebook 專頁:財技戲法

留言
分享