Sammy : 大跌市下的收入來源

分享

作者 : Sammy畢業於英國赫德斯菲爾德大學工商管理學系。曾為職業魔術師及婚禮司儀,現以財技角度切入分析股票,破解莊家的障眼法。

大跌市下的收入來源

大跌市加上殼價大跌,好多行家都叫苦連天,無人炒嘢自然成個行業半隻腳步入寒冬。飯可以唔食,水都要照飲,所以大家都係做下啲其他嘢幫補下。

其實除咗一般證券、期貨買賣之外,仲有好多方法都可以搵返多少茶錢,例如押股融資。不過呢條路依家難做好多,唔係間間都可以做到,而且問得借錢嘅上市公司本身個LTV(Loan to Ratio)都唔會高得去邊,好多甚至乎無㖭。所以依家好多做法會屈埋佢擺啲倉過來間行做埋Trade,或者每個月都做幾多成交量,成個Package咁做。好處係幫到人借錢之餘,自己又分到兩份佣。第二樣搵錢就係幫手做每日嘅「Turn」,一個總指揮會負責打電話畀個經紀落指令,經紀就負責搵一個乾淨無手尾跟嘅戶口做「頭」,每次都會打錢入去,淨燒佣金到用晒又再加過。以前呢啲都係好方便,但依家證監打擊人頭活動得好犀利,有咗雙重認證碼之後所有嘢成本高咗好多,包括每個「頭」都要買一個太空電話、一張太空卡for上網,因為依家唔可以話將五個戶口嘅保安編碼同時安裝落一部手機,而且同一個Wi-Fi唔可以用來Login幾個戶口,因為只要同一個Wi-Fi有幾個戶口同時Login的話,證券行都會報告出,證監睇到又要解釋,即係話一間行做一次呢啲就要起碼買定幾部手提電腦同埋幾隻太空上網手指。

「砌飛」搵錢 你驚唔驚

除咗以上收入來源,出面好多細證券行都會做IPO Placing,通常一間包唔到來做就會拆開幾間一齊「砌飛」,首先「腦細」係會出幾個頭包攬幾張特大飛,其餘幾百個頭就打散幾間行來做,分好晒大中細飛,每種認購銀碼唔同所以中間收到嘅茶錢都會唔同,太概有佔總投入金額幾個percent左右嘅茶錢。由於贏輸係包底的,所以好受歡迎,每個月咁做個客計埋一年都有幾十Percent回報。個經紀要多「頭」在手,基本上大中細頭都有就會好做好多。所有嘢跟足電話錄音去做就萬無一失,但呢樣嘢一定要搵熟人做,一來證監有機會向個客問話,如果問多兩句就驚到講晒出來話自己做「頭」就大鑊,同埋最緊要嗰樣就係交收問題。假設贏的話,個客要抽起茶錢拎返個贏突嘅差額出來,相反輸錢就會其他途徑入返現金畀佢,因為做得呢啲嘅IPO有時會個價會踢高好多,都要注意個客走數嘅風險。

Facebook專頁:財技戲法

【權益披露:本人沒進行上述操作】

分享