作者 : 蕭永文 ( Raymond ) ，天大資產管理公司 投資總監，曾奪全港珠心算冠軍。 大學時期，「幸運地」遇上百年一遇的金融海嘯，因投資股票獲利12倍被報章訪問，另每年都能發掘倍升投資機會，成為專業投資者。
近期新股有亮點
市況反覆向下，如不夠膽量做空，不妨研究一下近期新股表現，或者不會睇住蝕咁無癮。當然你可能會問，個市咁差，藍籌股都咁嘅款，新股仲有咩好睇？答案係：一定好睇過騰訊（00700）470蚊跌落260蚊。當然你可能會再問，個市好嗰時，新經濟新股美團呀小米呀，你睇下依家幾慘淡，依家個市咁差，仲睇新股？
上市時機有學問
答案係：市況差都肯/敢上市的公司，會有番咁上下實力，大家睇下由10月上市的新股表現，23隻新股入面，截止11月13日，有17隻新股係正回報，當中有8隻的升幅更達40%-275% ，回報逾1倍的更有4隻，在如斯慘淡市況下，實在難得。如11月7日上市的新加坡建築、基建及室內裝修項目總承建商HON CORP（08259），非市場焦點的新經濟股板塊，但公開發售部分卻錄得超額認購21.53倍，首日表現升40%。另一隻無懼跌市上市的瑞威資管（01835）於11月13日首日掛牌 ，股價曾高開一成，可知當日恒指曾急挫500多點。筆者傾向同意有一個講法，市況強熱錢多，如果你是上市公司準備上市，當然會選擇這個時候集資，高估值容易被市場接受之外，亦有較大機會超額認購；相反市況弱，你有可能會暫時擱置上市計劃，待市況稍為好轉才重新申請上市。因此，上市時機對上市公司來說可能是一個學問。
選擇於市況弱的時候上市的公司，普遍有兩個可能性，一是公司覺得自己的估值合理，即使市況強弱，都仍能吸引市場資金；二是上市前大膽估計市況只是暫時轉弱，又或者現在不上，之後市況更差只會更難上，於是膽粗粗搏一把。雖然10月至今上市的新股有不錯表現，但為期不太長，預示作用不大。不過，市場告訴我們，大市雖差，但不至於沒有賺錢機會，Money Never Sleeps。
瑞威資管於11月13日首日掛牌，當日收市價5.21元。
