作者 : Sammy—畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
做飲食成功係有特別原因
香港地做飲食其實真係唔容易，但成功嘅餐廳都一定有一個模式喺度，筆者最近就試咗一間好成功嘅餐廳同一間失敗嘅餐廳，深水埗警署對面新開嗰間「三Triple Steak」就係失敗例子，首先呢間餐廳座位有40個，但出面條人龍就有起碼30幾至40幾人，大家唔好以為多人排隊就係成功，咁係大錯特錯！佢多人排但係同時入面有好多吉位，人手上根本唔能夠招呼客人入座，即係浪費咗啲吉嘅座位；其次間店學日本拉麵點同埋牛肉飯連鎖店咁整咗部自助售票機，但呢部售票機係弱智版嚟，假設要找15元佢就夠膽找15個1元，當十幾位客人買完票時售票機內一元已清空，要人手再放滿，簡直係低能！最後就係選用食材問題，自己燒係會節省人手，但佢又唔係畀客人百分百自己動手，送上餐前塊牛扒係預先料理至一成熟，食客要極速切好塊肉再燒熟根本係唔夠時間，筆者眼見好多客人食到一半就要換過一塊熱石板，又增加不必要嘅工作量。
第二間成功餐廳位於元朗叫「The Backstreet Kitchen」，主打兩款主食石燒吉列牛小排同埋一口牛肋肉，一份主食加埋個定食餐連飲品為150元左右一位。餐廳如其名一樣地點位於後巷，坐位只有區區20個，但勝在流轉速度夠快，一間餐廳成唔成功都要計埋食物由Order再送到客人面前食埋要幾多時間，呢間餐廳就做到40分鐘做到一枱客，淨係計佢午市加晚市都起碼有150個人頭，每位130元計，一個月都有接近60萬Turnover。佢最成功之處係兩份主食定位都係薄切牛而且件數多，賣相超靚仔、性價比極高，加上佢個石燒係不斷有蠟燭加熱，客人好快就可以將牛肉燒至熟透，加快張單嘅時間之餘又慳埋人手。試諗下同樣份量嘅牛肋肉燒好放落隻碟再加碗飯同湯都只能收定食價約80元，但轉咗石燒成件事就唔同晒，可以賣到百幾元一位。
筆者另一位好友Peter就深明呢個成功模式，在西灣河開了一間手工小火鍋，食物由Order到送到客人面前自己煮食，最後埋單都唔超過30分鐘，真正可以做到客如輪轉。
華隆金控有潛質舞到飛天
華隆金控（01682）近排氣勢如虹，日日升幾格打到上來1.09元，剛通過埋一個授予董事訂立一個自己友「圍威喂」協議同交易，鑒於呢隻股票真係超級乾身，所以都唔會定一個目標價，因為可以舞到飛天都得，當日配售價0.7元畀吳生前筆者都記得佢個仔手貨係0.9X元，就當一倍多少少散都起碼2元吧！筆者同好友P君都有少量貨在手，總之Set個位假設大成交隊落去咪賺一格都走囉，起碼原則上唔好輸丫嘛，贏住得食點都感覺良好啲。根據過去往績，吳生咁耐無搞過手上啲股票，要舞高幾倍就肯定唔難嘅，至於有冇十倍就要講下緣份。
Facebook專頁：財技戲法
【權益披露：本人持有華隆金控股份】
