MoneyKOL:慶幸我窮過

分享

作者:「MoneyKOL」 – 是一個專業的網上財經平台,匯集多位來至不同領域和背景的財經界KOL(Key Opinion Leader),致力為讀者提供更貼市的財經資訊,好讓讀者找到更適合和更好的機遇。

慶幸我窮過

窮,以前的我的確很窮,窮到口渴也不捨得買支五蚊的水飲。心諗,自己煲水唔使錢,買支水要五蚊,好貴!還記得多年前,巴士剛引入冷氣巴,我唔捨得花多一倍錢坐,我情願等下一架「熱狗」巴士,冇辦法,因我窮,慳得就慳。我窮可以用時間去換錢,而有錢人就用錢去換時間。當你窮過,就可以深深感受到窮人對現實生活的無奈,同時也會體會到窮人的思維。窮人每月搵到的錢係咁多就係咁多,可以使到的錢,最盡都係咁多,所以每個月也只能夠量入為出。

當窮人一家收入兩萬蚊計,佢哋租樓的開支預計最多一萬。以前一萬可租500呎單位住,但由於物價通漲,幾年後500呎的樓就要租萬五蚊。窮人無奈只能再搵一間一萬蚊租金的樓去租,但可能只得400呎。再過幾年,400呎的樓租金升到萬五蚊。窮人可支出的租金還是不變,也是一萬蚊,最後佢哋只能向現實低頭,租一個一萬蚊月租的300呎單位。這個現象就印證了,為何近幾年來,細單位無論租值或成交價都大大跑贏大價樓;也印證了細價樓為何是窮人恩物,排隊等買的道理,而不是外間所講的細價樓爆煲,就算要爆煲都要等到無了剛性需求才會爆。但對窮人來講,如果租開一萬蚊月租的細樓,不會轉去租三萬蚊的。租金的支持下,造就了業主「有人幫佢供樓,而且月月有錢剩」的回報。

以細單位河畔花園為例,現時月租12,000元左右,樓價400萬至440萬左右。400萬樓,三成首期,供30年,年利息2厘,每月供款10,300元。供樓每月10,300元,供平過租。供樓每月幾千蚊係銀行利息,但最少有5,000幾蚊係還本金。如供三年後,其實已還近20萬元,即其實為自己儲了20萬的錢。窮人租樓每月用咗萬二蚊,幫人供樓,供完自己一無所得。有人話,供樓做一世「樓奴」,咁租樓又何嘗不是「租樓奴」?

但當買入細價樓幾年後,其實市場開始又有變化。因上車的嗰班人,供了幾年樓,結埋婚,生埋仔。就會開始覺得細單位唔夠住。佢哋又要開始新的一頁,換三房。大家都知,近年政府為了達到起樓數目的要求,推出了限呎樓,鼓勵發展商起多些蚊型樓。所以,可達到政府所說的每年幾萬個單位,發展商也樂意跟隨。將一個大單位改成三個細單位賣。大單位呎價兩萬,細單位可賣三萬,齊齊開心。但三房的供應隨著需求變得唔夠。所以我相信,跟住下來的日子,三房的大單位呎價又會追上來。下次有時間分享窮人家的我,點選擇平靚正的樓。

分享