作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
養殼越來越難
上周筆者俾大老闆叫咗出去飲嘢，在坐位位喺中環都係高手中嘅高手，六個人收市後飲了三大支威士忌，好彩其中一個大佬有存開貨，最後又存多幾支在酒吧。我哋都係邊飲邊傾偈，講到個市場極度水緊，公司最近咩人嚟拍門都唔借，好在筆者最近搭尾班車做成單細刁，如果再遲啲就「奶嘢」。另外講到市場殼的供應越來越多，殼價大跌之餘真係好難先傾成一單賣殼，因為潛在賣家多了，自然買家都唔愁無殼賣。個個話買殼嘅老闆都係放幾十條線出去話有意搵殼，實情係周圍「Shop Around」，結果十個跑刁嘅都係九個白做。第二樣最大問題係啤殼容易但養殼麻煩，嚴格上嚟講都唔係容易，不過夠料上嘅又肯洗少少錢，都無話唔得嘅。至於講到養殼就當然係要維持上市公司嘅上市地位啦，一間上市公司要有佢足夠嘅業務去運作，否則就會被要求停牌、被DQ。除此之外上市公司每年要畀會計、核數師費用，又要做做成交，無返幾百至千鬆啲萬都唔洗旨意。最近呢個3月尾至4月頭多間上市公司都要延遲出業績公告，明顯係核數嚴咗，大家都過唔到核數呢關，聽講係有一大堆公司都係面對緊呢個問題，所以咪睇個市破頂升得好地地咁，隨時可能危機四伏都未定。
半新股達力環保
上周老闆話華誼王中軍落咗嚟香港，唔知係慶生日定係指揮香港呢邊嘅操作喇，不過點都好，佢都要諗下計仔點搞返起香港呢隻殼。今日筆者見到好友C君呢隻股票揸咗好幾個月一股都唔沽，依家肯郁少少就同大家推介下達力環保（01790），佢上年11月29日上市，定價每股0.58元，集團係喺中國寧夏省會銀川經營及管理四間污水處理設施的污水處理服務供應商。睇CCASS大股東紙股票75%、頭兩間行揸18.93%，佢仲要上市半年收咗咁多個月貨已經係「Dry Like My忽傾Wallet」喇，剛剛公布完全年業績，公司無論生意額、毛利、純利都有顯著增長，而且基本上由於佢係做污水處理行業，所以呢個數係相當穩定實食無痴牙嗰隻。資產方面現金已佔約3億元左右，另外應收帳佔比較大，其他負債都係有數得計，基本上現價0.73元嘅市值比起10幾億NAV係非常吸引。
【權益披露：本人沒持有上述股份】
Facebook 專頁：財技戲法
