作者：陳敏思（Mandy），獨立股評人，喜歡各類投資：股票、洐生工具、鑽石、房地產等，最捨得的長遠投資必然是自我增值。
抽新股留意事項
今期就講吓投資嘅陷阱，抽新股最忌人抽我又抽，連業務做些甚麼也不知道就走去抽，其實認購新股嘅時候，人哋已經擺咗大大本招股書喺銀行同埋證券行，不過你哋又會話「咁厚」！唔通真係走去睇咩，但係依家可以上網睇，你又唔會有咁嘅興致走去搵，所以，就會睇吓依家最多人抽嘅係咩嘢，同埋孖展借咗幾多/借得多唔多，而去決定抽唔抽。
小妹建議大家如果真係冇時間睇招股書，最低限度睇幾樣嘢：公司業務做些甚麼？過往的業績做成點樣？未來的發展同埋方向，有冇負債？同埋公司集資嘅用途用來做啲咩嘢？如果集資是用來還債的話就唔使諗啦。如果深入啲可以睇吓保薦人嘅實力雄唔雄厚，只要你Google吓佢嘅背景同埋佢過往嘅戰績，如果佢之前保薦那幾隻股票都跌穿招股價嘅話，咁就好大危機啦，仲要睇吓有冇禁售期？如果有，可能會比較好，因為唔會一開場就「隊」穿個股價，仲有孖展借得多並不代表多人抽就一定贏硬的，因為之前已經試過多人抽的新股，一開場已經「隊」穿了招股價，所以根本就唔可以作為指標性嘅參考，希望呢啲嘢幫到大家。
