作者:潘啟才（Phemey），測量師出身，試過輕輕鬆鬆年薪過百萬，亦試過胼手胝足地創業。後來發覺幫人做成生意最過癮，成功拉攏買賣雙方便穩袋幾百萬，至此「通天經紀」之名便不脛而走。眼光準、膽量大兼且身體力行，搞炒股投資班大賺一筆之餘，亦計劃大搞創業班，矢言教授云云打工仔、待業青年、大學生無本生利，財來八方的本事。
身體力行 求新求變
我好少會對別人的評價在意，因為我自己本身就係好臭口，成日都會亂咁鬧人，既然自己都係咁嘅人，所以我認為別人對我的評價根本唔使理。此之所以，去年年中有關多個媒體對我的報道，對我嚟講，除了唔開心了半日以外，覺得個班無面見人的人低B及不知所謂外，基本上對我沒有任何影響。但近期在合眾會的聚會上，周大師的一番說話，卻令我非常在意，究竟我的做人做事方式是好還是壞呢？他說最近渾水找他食飯吹水，渾水問大師如何可以保持永遠青春，拒做老海鮮，大師回應説：「按你目前的發展方向，好難保持永遠青春。」他繼續說：「以他認識的人之中，最能保持永遠青春的人是Phemey。」他並解釋，因為以他認識的Phemey，當有deal做，就跑去做deal，當認識他之後，覺得股票財技班有得搞，又馬上撲去開班，當比特幣大升之後，又馬上去搞掘礦，賣礦機及在香港搞礦場，當知道劏房及學生宿舍有得搞，又馬上撲咗去搞，而他認為這種做事方式，就可以保持永遠青春。
真心講，我真係無諗過咁様做人做事，可以保持永遠青春，我選擇咁樣做事的原因，是因為覺得人生苦短，如果在我的有生之年，唔試多啲不同嘅嘢，那麼在我離世的一刻，我會後悔。就以在此寫此專欄為例，如果唔係因為我睇了大師的《炒股密碼》，驚為天書，繼而認識了大師，協助他開班授徒，繼而自己也開班，令自己在股場中有點名氣後，係會有不同媒體搵我寫股票專欄的。而作為本業本來是產業測量師的我，我真係未有認識过一個測量師，會像我一様，不論成功與失敗，會不停嘗試不同的新搞作。
由於我自己這種喜歡做不同的事及試不同的新搞作，我越來越難明點解我的大部分理工畢業的同學，可以在同一個機構做幾十年，而事實上，在一個機構做幾十年，想唔變老海鮮真係好難。
而我這種做事方式，由於天天在變，所以炒老千股，教人炒老千股，炒賣虛擬貨幣，在香港搞比特幣礦場，搞劏房及港漂學生宿舍，出任香港上市公司主席，及其他各種古靈精怪的搵錢方法，其實只要是合法，合情及合理，可以的話，我都會去試。其實我咁様去做事，我知道係唔會發到達，因為要發達，一定要專心，去把一個事業，盡快把他做大做強，成為行內龍頭，這樣才能搵大錢。但對於我，這樣做事太沒趣了，因為我需要不停地，重覆地把某些事做得好，而這種做事方式不適合我，所以我用不了這方法，也因此發不了達。
最後，講一下股票，由於細價股巿場仍然不好，只能靠炒下半新股贏啲錢，但由於要金精火眼睇住盤路兼數住倉，真係唔係好啱我，我仍然念念不忘幾年前買中一隻贏幾倍的日子。
近期睇住機而能令我開心番啲的炒賣工具，肯定是非比特幣莫屬，執筆寫到這裡，查下比特幣價，原來是12,600美元，比今年低位升了約300%。
