作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
絕處逢生的期殼嘗之味
股神巴菲特（Warren Buffett）講過潮退時就會知道邊個無著褲，問題依家個市唔係潮退，係個大浪殺到埋嚟，基本上有著褲嘅都一早沖甩咗。
雖然依家推咩股都死，但都無辦法之下都要講下有咩股抗跌能力係好啲嘅。上周筆者就喺另一個平台推介隻K2 F&B（02108），資料顯示集團為新加坡餐飲集團，在擁有及營運新加坡美食中心及美食街方面擁有超過15年經驗。目前，集團的業務分為餐飲零售業務及店舖管理及租賃業務。筆者收到風期殼價3億元，淨係計個殼價都要0.375元，間公司上市差唔多已經有半年，如果係計交收又未到期；但係睇佢公司賺少少錢、負債唔多、上半年頭都收返齊再加上股權算集中，而家仲要個價回咗落嚟。筆者上周寫完篇文第二日公司股價已由0.235元飛升到最高0.35元，睇經紀牌明顯係有炒房負責維持秩序，但最近兩日股價回落至0.26元筆者認為係一個極好機會偷佢雞，當然偷雞唔到會蝕渣米，但一旦偷雞成功打返上0.35元又確係爽歪歪嘅。
仲有一點要提就係有一日早市競價時段有mark過上0.35元，點知當日開市就係0.3元邊開，之後一直有沖上去0.35元。其實好多「廚房」都會用競價時段去試盤，試下去到咩位就有幾多沽壓，如果無乜沽壓就可以開市造上去嗰啲位。曾經有個大哥出來食飯時講，啲人都傻傻哋嘅，嗰啲電波圖（佢指陰陽燭圖）係我哋畫咋嘛，我鍾意三日烏鴉完整返支一柱擎天發發聲金剛不到十幾日仲得呀（以上係原句：當時筆者強忍住唔笑）
仲有另一隻期殼股筆者上期《炒股幫》升股派街坊比賽都有推介，就係嘗之味（08096），呢間公司又係差唔多上市半年，筆者收到風期殼價差唔多有「億尾」接近2億元，公司現價0.181元市值只有區區9,000萬元，最近一個財政年度公司現金有8,000餘萬元，即係話如果唔係乾跌或者無人維持秩序，根本無乜可能會輸，不過想買入嘅讀者真係要諗清楚，依家買完你要預佢一年半載停喺度，或者有機會會無啦啦乾跌，始終莊家無錢到有機會連適當嘅秩序都無人維持。
呢幾個月都無新IPO上市，下一期可能講下一間街貨可能只有2%嘅物業發展公司，呢間上市未夠一年以同類公司嚟講市值又唔算好大。
【權益披露：本人沒持有上述股份】
Facebook 專頁：財技戲法
