P5 財技戲法
Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：留意貼地食平啲概念股
上期筆者介紹的中國科培（01890）表現不俗，繼續創新高，有動力上升之餘成交上亦配合到，可以繼續持有。除咗教育股之外，其實都有唔少選擇，例如筆者在另一平台推介過的「食平啲概念股」。呢幾個月經濟明顯差咗，好多行業有機會面臨裁員或者公司倒閉，市民搵唔到食或者搵少咗，自自然然就要諗開源節流，開源方面唔係話諗到就即時有，最快而有效嘅方法就係節流，買少件衫食平啲就最實際。話明係食平啲，價錢相對一定要平民化，飲食板塊都有好多間上市公司，但究竟有邊啲上市公司符合以上條件呢？
餐飲板塊選擇
香港飲食板塊主板加創業板加埋就有40間，創業板首先唔考慮之下主板佔去22間，當中酒樓股可以篩走佢先，因為酒樓屬於中高端食肆，好多酒樓人流都少咗一半，當中有稻香控股（00573）、環科國際（00657）、富臨集團控股（01443）、譽宴集團（01483）、首灃控股（01703）、利寶閣集團（01869）、敘福樓集團（01978）等，雖然其中有啲公司如富臨集團控股（01443）有經營其他「炑八韓烤」及「炑八Taste」，還有其他火鍋概念系列「富城火鍋海鮮酒家」、「正冬火鍋料理」、「正冬魚塘公」、「四季文昌」等；敘福樓集團經營「牛角」及「溫野菜」，但始終唔係走平民路線，價錢唔夠貼地。剩番落嚟嘅唐宮中國（01181）、國際天食（03666）、主要係經營中高檔餐廳；火鍋類股份有海底撈（06862）、經營輝哥火鍋的龍輝國際（01007）；只有翠華控股（01314）、民商創科（01632）、太興集團（06811）叫做貼地少少，但大家諗食平嘢會唔會第一時間諗起翠華、越棧、太興？相信大部分人都會揀大快活（00052）、大家樂（00341）、中港兩地經營吉野家嘅合興集團（00047）。喺目前香港經濟環境不景氣下，呢啲公司絕對有抵抗甚至擴張能力，而且又有股息收。
就以合興集團為例現價0.117元市值有11.78億元，近兩年末期派息比例都算高；另外兩間連鎖快餐大快活、大家樂一年有兩次派息都唔錯。三間公司嚟講合興成交比較細，有買完沽唔到嘅風險，另外兩隻就穩穩陣陣咁啦，不過筆者個人比較喜歡大家樂。
【權益披露：本人沒持有以上股份】
Facebook專頁：財技戲法
