作者: 中環高跟鞋
辦公室利是千奇唔好慳！
小妹祝各位讀者萬事如意、狗年行大運、股場大勝！話咁快又一年，農曆新年除左有幾日假期之外，重頭戲當然係派利是！派利是既人士莫說荷包會大出血，仲要注意有無派漏，人情做得足唔足等等，當中有唔少學問。至於辦公室派利是更是博士級的學問，一封利是牽涉的職場倫理並唔簡單，已婚人士派利是予未婚者，似是傳統習慣，但已婚下屬遇上未婚上司，呢封利是派好唔派好？派幾多？而對未婚一族來說，復工日唯一動力就係逗利是。除了黎自上司既利是，通常還會收到公司的「開工利是」，金額多少按行業和公司規模有所不同。有中小企商會表示，今年的開工利是一般由100至500元不等，員工較少的小企業，利是金額通常較高。
打工仔若然收到封銀碼令人醒神嘅開工利是，仲爽過食早晨全餐。銀碼太細難免會被「口舌怪」到處唱你孤寒，隨時講足幾年。小妹個friend收到嘅開工利是，就連早晨全餐都買唔起，所以想借我個地盤黎唱下佢。自畢業後，佢都做過8份工，今年第一次收呢間公司既開工利是，收到係有史以黎最低，廿蚊雞，整個department得6條友，即合共120蚊。今時今日百物騰貴，莫講話早餐買唔起，員工自己派畀屋企樓下個看更呀，都唔止呢個價啦！
小妹即時八卦市面上開工利是，大部份都係$50-$100，某傳媒機構有$300，某建造業公司有$500，而中信銀行有$2000！即係話人哋逗一年，等於我個friend逗100年呀！逗到你退休都唔夠人哋收一封，問你死未？
其實開工利是都係老闆對員工心意，攞個意頭，唔似去飲做人情，冇話公價，又冇話老奉要畀，畀得少都好難怪老闆啲乜。不過如果封利是令到員工醒神，做嘢爽手啲，簽多幾張單，湊多幾個客，最後咪又係公司得益！
小妹提醒大家，公司入面千奇咪漏派比接待姐姐、秘書，因為佢地係公司既順風耳，也是千里眼，秘書潛伏係各大高層的身邊，經常第一時間收到各方消息，不論裁員、升職等八卦，甚至各項申請、表格領取等公事，都能予以你方便，呢封利市唔少得。
