作者：KK x Suki x Toby
「飲茶」最愛奶皇包「睇住流嘢」
周日晏晝，去咗一間個名叫「飲茶」嘅餐廳度飲茶。未入去之前其實本身想過隔離食西餐，但眼見中餐廳人數比西餐廳多，加上門口又有吸引人嘅食物圖片，我都忍唔住要入去。
最吸引我嘅就係呢個好醜樣又好可愛嘅包圖，佢個名叫做「睇住流嘢」，可想而知就係一個奶皇包，相信呢個奶皇包入邊係落咗鹹蛋，食物比較鹹，好冶味，呢個包一定要熱辣辣食，凍咗真係冇咁好食。
當我想食最後一個「睇住流嘢」嘅時候，決定Share，咁就搣開個有「眼睛」嘅包，呢個時候隔離枱嘅小朋友忽然不斷喊，我心諗我都係想食個包，要搣開啫，唔係咁殘忍，要喊得咁勁嘛。
我哋叫咗壺紅袍，其實佢哋有好多隻唔同嘅茶，例如綠茶、花茶。點解叫紅袍？因為呢個係有紅棗嘅紅袍，眾所周知紅棗對女性好。不過，入邊茶味道相對有啲淡，茶味不足，對最鍾意飲茶嘅人來講有啲失望。餐具就非常精緻，環境亦都比一般飲茶嘅餐廳坐得舒服。
作為一個女性要滋陰，飲湯啱晒你。所以，你要叫呢個椰汁鮑魚雞湯，相信佢都煲咗好耐，因為要入邊嘅肉可以成塊起出嚟。飲落非常有椰子肉味，入邊嘅雞肉材料雖然唔多，但叫做尚算可以。至於個粒鮑魚，我都有啲嚇親，因為真係太細粒，嚇親之後第二個反應係笑咗出嚟，建議不如叫番椰汁雞湯啦。
一睇就知張相入邊嘅我已經到咗Weekend Mood，想知更多美食，Follow我嘅Instagram：Toby_hendrickss。
