作者：Sammy
風頭火勢黎氏唔好買
新年後筆者曾經推介過嘅IBI Group Holdings（01547）由推介時0.385元，到近期高位0.51元都有明顯唔錯嘅升幅，就算現價稍為回落至0.46元都係相當抵買，仍然可以持有。大股東Keep住有在0.4元樓下不斷增持，而且仲有一仙股息派都算係行「老正」路線，對於佢日後走勢睇法，筆者都係持樂觀博賣殼心態，現價計潛在升幅仲有差唔多一倍㖭。另外隻恒都集團（00725）由筆者推介時1.38元到現價1.72元都係算幾穩陣，希望佢可以逐少逐少慢慢繼續踢上到3元吧！
就喺早一個星期多之前發生咗一單笑料，就係黎氏企業（02266）有近百人發起苦主遊行，事發之後嗰日可能有心人嬲嬲豬，所以再跌多12%賀一賀佢。呢間公司喺2017年2月10日上市，招股價1.15元，公司主要業務為澳門提供建築、裝修工程服務。上市後其實佢曾經大炒一倍至3.3元，不過之後股價一直徐徐下跌，一年後嘅今日都係毫無起色。有人話認購後會被包底每個戶口贏兩萬元，依家公司否認所有指控。
首先，筆者唔評論呢單嘢係咪詐騙嘅真確性，假設呢一百幾十人係散戶，都唔會無端端買一隻建築股，就算係買都唔會大槍大槍咁買，咁大手買得嘅一定係有啲嘢，同埋股價大升到三個幾，正常人類都會忍唔住食吓胡吧？筆者唯一諗到啲貨可能係唔沽得。始終口頭講嘅嘢邊度可信㗎？股票嘅嘢講白啲其實咪又係一張紙，我細細個玩Card Game時就知呢樣嘢，曾經有個同年蠱惑小朋友同我講某張遊戲卡佢話益我，轉讓一張俾我400元，話出面起碼賣到900至1,000元，呢個套番落呢件事度，都係一樣簡單戇膠道理，係唔明點解仲有人會中伏，可能係源於貪念啩，一個人貪起上來真係會智力大幅減低。
究竟呢單嘢有咩值得參考？就係暫時唔好掂佢囉，成百幾個苦主大手買咗都到依家都未甩到身，搞到要遊行咁大陣仗，無理由淨係係買咗一至兩手吧？起碼得啲苦主們輸乾輸淨、供吓股、配吓二十二十先啦，假設我係大股東黎氏父子，又假設我真係有「棟」過呢一百幾十人（假設咋），我係會毫不留情咁將個股價質落去，等佢哋渣都無得剩，風頭火勢真係搵鬼買咩！（雖然咁諗好似有啲無人性）
因為身在北海道不方便傳文，所以呢一期筆者都係預早交定稿。逢親筆者外遊，持有嘅股票總有一兩隻爆升，希望今次都係一樣吧！
