Sammy:寶光叫三飛 金力有前科

分享

作者:Sammy畢業於英國赫德斯菲爾德大學工商管理學系。曾任職業魔術師及婚禮司儀,現以財技角度切入分析股票,破解莊家的障眼法。

寶光叫三飛 金力有前科

圓通速遞國際(06123),如果大家有跟買嘅話應該享受到唔錯嘅升幅,筆者Facebook專頁透露已在大升至7元當天全數沽清,然後轉買了寶光實業(00084)。

寶光實業呢間公司主要分為鐘錶業務、眼鏡業務兩大類,鐘錶業務主營「時間廊」的鐘錶零售業務、鐘錶批發貿易業務,以及位於瑞士的瑞士手錶機芯及瑞士製鐘錶的生產設施。「時間廊」的鐘錶零售業務擁有獨特的業務模式,是銷售外購代理品牌並同時生產自家品牌(例如於「時間廊」門店獨家出售的「鐵達時」及「CYMA」品牌)的多品牌零售商。餘下業務亦是「精工」鐘錶在馬來西亞、新加坡及香港的獨家分銷商;至於集團的眼鏡業務為眼鏡88、EGG零售業務及Thong Sia Optical分店遍布中國、澳門、香港、新加坡、泰國及馬來西亞。

早喺今年一月初時,寶光實業宣布將以作價4億元(港幣·下同)出售所有眼鏡業務,然後派特別息每股0.19元,股價隨即踢高至0.9元樓上,其後基金減持至不需要披露的水平3.95%,加上一次又一次延期發通函,股價才回歸基本。但現在已出了通函,呢篇文出街之時正正就係實光召開臨時股東大會(EGM)之日,只要通過股東會(理論上無可能唔通過,因為買家係大股東),就會有明確時間表出來,話晒每股現價0.69元計有0.19元特別息真係相當吸引吧!點計都係抵買,以寶光現市值約7億元,佢NAV淨資產高產9.2億元,現金有5.3億元,單係計呢幾樣嘢加上主板殼價已經係無得頂啦!一隻股票叫3P(即係三飛):賣殼、派特別高息、現價嚴重低估。

上次預告過今期推介金力集團(03919)(下稱金力)就一定唔會走數嘅,話說筆者絕無內幕,都係朋友P君同我講話呢間公司準備賣,咁我梗係再三打聽一下個消息來源啦,佢話係啲大陸老闆講嘅;而咁啱筆者另一位朋友東兄又話聽到有「3蚊」,就咁就勾起筆者條癮去研究,原來金力好耐之前喺主板上過市,當時上市編號為(00603)現名為中油燃氣,當年業務賣番俾大股東,殼就賣俾光通信,其後股價大炒百倍,至2015年先喺創業板以編號(08038)上市,到上年2017年11月才轉過來主板,單單個背景已經夠吸引啦,更何況現價0.92元個「Cap」只得2.2億元,淨係計佢NAV都2.5億元啦,加埋殼價?你懂的。

今期心水仲有隻華誼騰訊娛樂(00419)。

【權益披露:本人持有寶光實業和華誼騰訊娛樂股份】

寶光實業(00084)
分享