EC執:以輪擊石

分享

作者:EC執。簡介:全職注冊中醫師。新城財經台(重新睇健康)環節(正中醫理)主講。無論疾病或投資上的病痛,都用望聞問切去辨症,再用固本培元的方法去施治,希望投資路上的心得,可讓你藥到病除。

以輪擊石

輪=窩輪,又名認股證,分為認購證和認沽證兩種。在香港發行的輪大多是歐式輪,即以現金結算,而美式輪是可直接換實物股票。以前的輪五花八門,又激活式,又窗口式,由於玩法繁複,所以大多數參予者都唔明,最後發行商唯有只發行歐式輪。除了發行商發售的輪之外,有些公司也有發行公司輪,例如公司輪到期,而正股價錢高於換股價,散戶是可以直接換股的。

在我多年投資輪的心得,好聽就叫投資,唔好聽就叫賭錢,因為風險比玩股票大好多。

玩輪首先要認清方向,如睇好就買認購輪,睇淡就買認沽輪,然後再計算機會率。基本上玩輪會遇以下三種情況:

(一)你買升,大市升,你中;

(二)你買升,大市跌,你唔中;

(三)你買升,大市唔上唔落,你唔中。

正常理解下,一個人去賭,贏錢機會是得三分之一,因為如果是牛市,你依然會輸,輸時間值。

除了賭大市方向,還有一個重要因素就是輪商,因為我們買佢的輪,就是同佢對睹。雖然是對賭,但都要選一個有「良心」的輪商去賭,如果不嚴選輪商,分分鐘贏錢的機會只剩下五分一:

(一)你買升,大市升,輪升,你中;

(二)你買升,大市跌,輪跌,你唔中;

(三)你買升,大市唔上唔落,輪跌,你唔中;(因為唔升唔跌時,輪會收引伸波幅同消耗時間值,所以跌)

(四)你買升,大市升,輪跌,即睇中買唔中;(因為輪商收引伸波幅,所以正股升,輪有權唔升)

(五)你買升,大市升,輪無價,即睇中買中但無錢收。(因為輪商唔肯出價)

以上就是炒輪的風險,所以炒輪第一要買中方向,第二要買中一隻跟方向行的輪。第一樣對好多人黎講買中方向都難,如再要買中方向行的輪更難。因散戶炒輪好多時遇到的正股升,輪唔升,反跌;或者買中隻輪,正股開市大升,到了自己的目標價諗住開市沽出隻輪,點知發行商唔開價,正股高開後一路跌,打回原形,輪商先出價,明明大賺變到打回原形。所以我會講下我點選擇買一隻輪。

(一)發行商

發行商要選一個好的莊家是好重要,否則未落場先輸,所以要找個開價好的發行商去買。好的莊家會於開市時段肯一早出價,而且出的價合理,咁點判斷個價合理不合理?例如你買佢的貨要高幾格買,走貨要低幾格走就唔合理。如對盤買入價0.1,賣出價0.101,是合理;如開買入價0.1,賣出價0.105,即你買貨要買貴五個位,變相先輸5%就是不合理。

(二)輪篇號

輪的篇號唔多講。

(三)認購還是認沽

認購認沽睇你當時點選擇,也唔多講。

(四)輪種類(一般都是標淮歐式)

種類買前最好都睇多次,唔知乜種就唔好買。

(五)到期日

到期日是炒輪中好重要的一環。例如你預期三個月後正股升30%,但你隻輪兩個月就到期,你是食唔到佢的升幅。但如果買太長期的輪,也有機會消耗時間值,每日少幾格,所以最好買的是三個月至六個月的輪。待續。

【權益披露:本人沒持有認購證和認沽證】

 

分享