作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
細劉於利福中國的回購技
寶光實業（00084）已通過股東會，唯獨股價當日南下行過，不過睇成交又無咩好擔心，所以大家有貨都係渣住先；另外圓通速遞國際（06123）應該如筆者預計之中，會先橫行一段時間才會再展升浪，所以資金都係調配番喺啲當炒股份比較划算。
早在上年，劉鑾鴻（下稱：細劉）將2013年由利福國際（01212）分拆出來的利福地產賣殼俾福建三盛地產後易名三盛控股（02183），股價一直飛升，記得上年同好友東兄討論過，炒完三盛控股之後下隻大概就輪到利福中國（02136），所以筆者一直都有望實利福中國嘅動向。話說細劉在分拆完三盛控股三年之後的2016年，再度分拆利福中國在主板上市，同樣都係分拆出來的就已經令人期待。就喺個幾月前3月20日，利福國際、利福中國一同停牌以待公布主要股東股權變動，原來係卡搭爾基金公司Bellshill Investment Company出售兩隻「利福孖寶」23.16%股權，其中利福中國作價2.03元出售，細劉同意認購當中11.61%令控股權增至63.3%，同時將認購任何尚未獲市場認購的餘下配售股份之未售部分。復牌後利福中國一直飛升至2.6元水平，然後無以為繼慢慢下跌，最近出現回購動作令筆者對佢往後發展充滿無限幻想。
首先卡搭爾基金公司Bellshill出貨，事前肯定有知會細劉，但點解細劉只認購11.61%而唔係認購埋餘下11.55%股份？究竟係細劉要增持埋「阿媽」利福國際無多餘錢，還是想做善長人翁以2.03元配售價益下街外人有錢齊齊賺？箇中原因好快就知曉！UBS為今次配售代理，完成配售時該批股份大部分約19.16%仍然留在UBS，只餘部分去了法巴證券、東興證券、JPMORGAN、美林，如果大家有睇之前筆者寫三盛控股的文章，見到有東興證券喺（02136）度出現，都會眼睛發亮。之後大約一個星期就出現了公司回購股份，公司回購股份是有一定限制的，只能回購不多於佔已發行股份的10%、回購價格不得高於之前五個交易日平均收市價的5%，另外每逢公布季度、中期、全年業績前一個月都不能回購股份。假如細劉一早決定以公司回購股份，就明白到點解佢唔接晒Bellshill嗰23.16%股份，因為公司以現金回購咗嘅股份會做註銷，已發行股數會不斷減少；假設細劉接晒嗰批貨，持股量就會增至74.85%。回購不斷註銷股份（最新回購價為2.74元至2.75元），細劉持股量就會好大機會超過75%而不符合上市規定的公眾持股量。
以細劉咁精通財技之人，假設佢一邊以友好接下其餘股份，制造公眾持股量增加的掩眼法，同時回購股份收乾街貨量，將來賣殼或者做私有化就會方便得多。
【權益披露：本人持有寶光實業、三盛控股、利福中國股份】
