作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
細劉於利福中國的回購技（二）
筆者早在Facebook專頁「財技戲法」及炒股幫Live節目推介華誼騰訊娛樂（00419）股價將會一路向北，當時公司股價還在0.39元徘徊，直至執筆前即上周五（4月27日）收市價踢至0.46元，有跟買的讀者應該享受到不錯升幅。筆者一直講呢間公司潛在利好消息有好幾個，包括繼續剝離原有資產業務，未來半年加大力度在韓國與華納兄弟的合作電影，2018年有五套大片上映：5月份將有新戲《Champion》，由出演《與神同行》、《屍殺列車》、《犯罪都市》等多部人氣作品的馬東錫（Ma Dong Seok）領銜主演），另外2016年8月29日華誼兄弟和羅素兄弟在美國成立合資公司已發展差不多接近兩年，估計時期成熟就會對華誼騰訊娛樂、雲鋒基金進行受讓股權（變相注資）。
上回講到細劉於利福中國的回購技，公司做了連續七日回購，而且每次回購價位都貼近或等於回購上限，坊間更有人指細劉呢次回購屬於「暴力式回購」，呢次回購暴唔暴力其實都係觀點與角度，筆者淨係唔明點解有一樣嘢好明顯但竟然無人留意到或者係無人提及過。如果大家有留意盤路，每一次回購當日在回購價位都有新鴻基擺大盤接貨，留意是接貨而不是掃貨；同一時間有大手沽左邊，全數沽哂落左邊大盤，呢個貨量絕無可能係散戶盤，所以絕對有理由相信，係自己沽畀自己回購。筆者相信，自2016年7月15日利福國際（01212）分拆利福中國（02136）上市，細劉應持不少暗手；假設呢啲暗手盤係主動沽出，回購只係減少公司已發行股份數量同時順便套現。無錯，回購後公司現金減少了，但同時有另一個效果出現，就係EPS上升。大家唔好誤會係「易辦事」，筆者講緊係Earnings Per Share每股盈餘。先由卡搭爾投資局旗下公司Bellshill出售23.16%股權，到細劉只認購當中11.61%，一切都喺佢計劃布局，如果大家唔記得可以睇番上一篇《細劉於利福中國的回購技》，假設細劉係刻意用友好以2.03元認購Bellshill餘下11.55%股份，而且看CCASS變化股價之後上到3元樓上都沒有大手出貨，所有事就可以串連埋一齊。首先，利福中國未來出售資產，每股盈利及派息都會提高，刻意唔認購哂配售令變相表面加大了公眾持股量（唔好忘記公眾股東入面還有FMR LLC富達基金超過5.9%，回購後註銷了股份大家要自行調整），將來私有化都會方便操作。
今期貼士繼續係華誼騰訊娛樂和利福中國。
【權益披露：本人持有華誼騰訊娛樂及利福中國股份】
