陳敏思:比特幣期貨入場費6萬

分享
作者:陳敏思
思錢想厚

上星期突然出現小股災,好明顯大戶在沽貨,但散戶都以為係低位入貨好時機,點知上周四(12月7日)差點跌穿28,000點水平,嚇到個心離一離!好彩翌日升番300幾點,個人都定啲!如果之前回調時入咗騰訊控股(00700)嘅人都會有一份「智者榮耀」嘅感覺,因為起碼周五(12月8日)都執番唔少。

除咗股市好反覆之外,如果你哋最近有留意最Hit嘅投資工具比特幣(Bitcoin)嘅話就知佢會令你心情有幾咁忐忑!上周只用了一個星期就由10,000美元一度去到17,000美元嘅水平,但又極速回落至差不多14,000美元水平,好似玩過山車咁!

話說比特幣期貨已於周日(12月10日)在美國芝加哥期權交易所(CBOE)面世,和下周亦可在芝加哥商業交易所(CME)交易。在市場憧憬下,比特幣價格一直急漲,再惹泡沫爆破疑雲。仲要有香港期貨商表示,有計劃與美國的交易所合作,為香港的投資者提供交易比特幣期貨的渠道,料入場費至少6萬港元。

如無意外,比特幣期貨合約基本上要買一個或以上的比特幣,而且入場基本按金也較高,倒不如在貨幣交易平台直接買比特幣,因為買少於一個幣也可以。

不過,要留意比特幣除了價格狂飆之外,亦是全球集中度最高的資產。約1,000個帳戶持有了全球40%的比特幣,這批持有者具有影響比特幣整體的的定價能力,就等同於我們常常說股權集中的道理一樣,基本上莊家玩晒。

有些人覺得Bitcoin是一個騙局,但卻有人認為Bitcoin是另一種新興貨幣或是黃金2.0。

基本上我認為如果真的要投資Bitcoin,投資者必須要打定最大輸數係會輸掉全部投資的本金才可以博一博,多餘錢玩吓就無妨,千祈唔好俾佢帶動你情緒嘅高低起落。

【權益披露:本人持有騰訊控股股份】

分享