Sammy:又一隻加入監察名單

作者:Sammy畢業於英國赫德斯菲爾德大學工商管理學系。曾為職業魔術師及婚禮司儀,現以財技角度切入分析股票,破解莊家的障眼法。

又一隻加入監察名單

恭喜各位利福中國(02136)股價於上周五大破4元,由2.61元推介計足足有超過50%升幅,雖然周一單日大跌差不多有10%,但除非佢出現結構性改變,否則筆者暫時會繼續持有,一股都唔會沽住;就喺呢一日有唔少朋友問我點算走唔走貨好,其實之前利福中國都試過由2.6X元單日打番落2.3X元水平做回購,講真跌幅同依家比都相差唔大,股價之後咪又係咁上。講到呢度剛剛公司出了周一回購公告,用咗4,405萬總共回購了11,732,500股,依家公司有入面大把現金,佢又繼續Keep住回購,咁股價就好快可以反映番個資產價值喇。

因為筆者呢排忙轉新公司,搞轉戶口都搞到頭都暈埋,所以直播節目暫時停一停先,安頓好所有嘢就會再同大家見面;不過放心,筆者雖然個人懶啲,但呢個欄會繼續每周出文。

之前講過,好股依然係利福中國(02136)、華誼騰訊娛樂(00419),大家見到走勢唔錯,筆者將會重點持有。點都好今日帶來一隻主板股票,大家不妨將會擺入Watch List先,因為筆者自己都係買入了小量,呢隻就係香港食品投資(00060)(前稱四洲食品投資、四洲食品網匯、四洲冷凍食品),集團集團之主要業務為從事冷凍肉類、零售小百貨以及食品投資,佢係香港最大凍肉進口商之一,從世界多個不同地區及國家(包括南美、美國、德國、英國、澳洲、智利、阿根庭、荷蘭、法國等)進口產品,包括雞類、豬類、牛類、海產類及其他急凍副食產品,其實佢除咗凍肉貿易生意之外,佢仲有喺廣州、佛山、東莞及深圳開拓及經營小百貨零售業務「大創生活館」。呢間公司最吸引筆者都係因為細細粒容易食,公司市值以現價1.08元計只有2.7億元,未計及佢資產值同埋主板殼價,最正係公司同時揸住四洲集團(00374)29.98%,睇番呢間四洲集團市值13.3億元,淨資產15.78億元,當中現金已經有8.15億元。最近公司喺3月19日公布一單非常重大出售物業,該物業為一幅位於新界西貢及於香港土地註冊處登記丈量約份第215約地段第1,107 號的土地,以及其上的大廈及建築物。該物業為一幢四層高之大廈,總建築面積約為5,573平方米,作價2.5億元,而重點係個買家,係人稱「舖王」嘅鄧成波先生。

見佢公告出完復牌大成交兼大升最多五成,依家回番去「一蚊邊」價位,筆者就先入一注起碼唔會走寶先。

【權益披露:筆者持有華誼騰訊娛樂和利福中國及香港食品投資股份】

Facebook 專頁:財技戲法

00060
留言
分享