頌伊:帶眼識股

分享

作者:頌伊

帶眼識股

小妹縱橫呢個財經界日子唔算長,但都見過不少上市公司亂咁嚟。公司長期無業務,只係年報強調「發掘不同潛在業務或投資機會,以多元化擴大收入來源」,呢類陳腔濫調文字早已聽到悶。由於無實質業務,又或是長期停牌,交易所會提出DQ上市地位,最近都提出要DQ華普智通(08165)、中國泰豐床品(00873)、山水水泥(00691)、金利通(08256),交易所會要求公司注入業務,若它們置若罔聞,才被判以「死緩」。

小妹仲讀梗小學時,無業務嘅殼股很少,絕大部分都有正式業務。不過,到了97之後,百業蕭條,正式經營業務的上市公司,死得更快,很多都欠下巨債,不是股權易手,便是執笠重組。喺呢種客觀環境之下,誰最得利呢?答案係從來不做生意,只拿著資產、假裝注資、大炒股票的股壇老千。

小妹早幾年親自serve過一間公司,老闆以每股一仙的價錢,向苟延殘喘的上市公司認購54億股新股,區區五千多萬元,便成功入主成為大股東,老闆買了隻殼,原有業務慢慢剝離,老闆見嗰排興乜就做乜,初時就話轉型做當鋪,一名華資證券行高層曾講過「佢最叻就係講故事,收購完無耐,已經搵我傾,將內地典當業講到天花龍鳳,話要仿效美國啲抵押財務機構咁。」不過,負責監管內地典當業的商務部旋即叫停,直指典當業尚未開放予外資經營,此舉實屬違法。其後,老闆又話同國務院新聞辦相關機構開發RFID無綫式智能咭電子門票系統;一時就出公告簽MOU做生產鋰離子電池,每次有「新」業務,雖然十劃都未有一撇,但老闆就要有鋪天蓋地式地報道,佢嘅目的顯而易見,最終有一劑high咗要上court,老闆被指控披露虛假或具誤導性的資料,以誘使投資者買入或出售證券,或藉此維持或推高公司的股價,雖然最後兩項控罪不成立,但佢個「名」都應該臭了。小妹好耐無同呢位老闆聯絡了,睇番佢呢幾年嘅年報,業務都係含含糊糊,幾行字就寫完,實際做緊乜就唯有當時人先知。

分享