招財密碼
潘啟才（Phemey），測量師出身，試過輕輕鬆鬆年薪過百萬，亦試過胼手胝足地創業。後來發覺幫人做成生意最過癮，成功拉攏買賣雙方便穩袋幾百萬，至此「通天經紀」之名便不脛而走。眼光準、膽量大兼且身體力行，搞炒股投資班大賺一筆之餘，亦計劃大搞創業班，矢言教授云云打工仔、待業青年、大學生無本生利，財來八方的本事。
【標題】中策集團的大茶飯越來越近
今次又要介紹的股票是中策集團，上市編號為235。之前已經有介紹過，現在想更新這只股票的近況。自從鄭家純入主中策集團後，中策嘅股價就好似坐過山車。原因就同佢收購保險公司有關，全世界都知鄭家純真係好想收購一間保險公司，但幾個月都未有消息，令中策變得好像賭場，不斷有人入去搏收購成功，但又無耐性等落去，急急腳沽貨走人。
不過，中策集團自己似乎對於收購極有信心，12月18日，委任左周文威加入董事會做執行董事，呢個人喺人壽保險方面，擁有超過二十年經驗，做過新加坡中國人壽CEO，負責香港同新加坡嘅人壽保險業務策略拓展同業務管理。睇黎中策對成功收購一事已經十拿九穩，準備好喺收購成功後大展拳腳。
而最新消息係，原來中策集團嘅目標係東亞人壽，而且已經打贏部分對手，順利第二階段投標嘅入圍名單。但留低的對手也非弱者，而係保險業龍頭友邦保險，意味住中策呢次要面臨嘅挑戰都好大，唔一定做得成單買賣。
睇返中策集團這間公司的質絕對唔差。根據中策最近的中期報告顯示，集團截至上年年中時，資產淨值有 大約33億元，當中包括1.33億股，當時值約13億元嘅恒大健康（00708）股票。但係，現在的恒大健康唔單止名都改左，就連股價都升上太空，變成市值幾千億嘅恒大汽車，股價升到 61元，作為股東的中策，當然成為大贏家啦，手上的恒大汽車股票，價值由13億元暴升至81億，帳面利潤成68億元，是鄭家純入股前，中策市值的幾倍。粗略估計，依家中策集團的資產淨值，加上配股得來的2億，至少過100億，而中策市值仲係得僅僅35億，可以說是禾桿冚珍珠的股票。所以它之前狂升，都是有道理。
總而言之，中策集團未來食粥定食飯，很大程度上取決於這次收購計劃的成敗，同埋鄭家純的部署。如果收購得以順利進行的話，中策的發展相信都無可限量，成為世界級富豪進軍金融業的前鋒。相反，收購失敗，就好可能打回原形，等到下一個機會來到為止。
