作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
喺邊度跌低 唔一定喺同一個位起身
4月可以話係一個充滿娛樂話題嘅一個月，首先有「安心」事件，再有Marvel粉絲期待已久嘅《復仇者聯盟4》。安心事件都係一件人夫出軌人哋女朋友事件，但正因為當時人嘅老婆係天后級，所以先震驚全香港人，甚至「揚威」國際。當日許生反應夠快，即刻含住兩泡眼淚加鼻涕開記招道歉，但佢講錯多一句說話，就係話「自己當晚飲咗好多酒，但佢知呢個唔係藉口」，咁你講嚟做乜？呢啲咪多餘嘢囉。飲醉唔記得自己做過啲嘢嘅醫學成因，係位於海馬體Hippocampus負責形成記憶嘅細胞，喺酒精水平極大提高時，喪失與其他腦細胞嘅聯繫，民間學名叫「斷片」。但影片睇到許生精靈活潑硬蹦蹦所以無可能係斷片。至於《復仇者聯盟4》筆者唔打算劇透，但票房話畀大家聽將來電影板塊係不容忽視，一套賣座電影收益絕對可以抵上一間上市公司幾年嘅收入。
關於雄岸科技（01647）筆者買了，但日前大跌被震走，因為望住個大利市報價真係忍唔到，好似要錢唔要貨咁掉出來，結果收市後出了份利好公告，旗下龍麻生物科技同廣州奇化訂立戰略合作協議。希望有買嘅朋友無被震走啦，不過就算震走咗都有下一隻。因為筆者不嬲都覺得股票市場從來都係一個神奇嘅地方，邊度跌底唔一定喺同一個位起身，第二度起身都一樣Work！
財技創板股御德國際
個森林咁大，無理由走甩隻雄岸科技就要喺度死𦧲嘅，咁啱上周五（4月26日）筆者睇到有隻創板股越升越有，加上有少少成交，於是就追入咗少少，所以同大家分享下呢隻御德國際控股（08048）。公司前身叫志鴻科技，在2000年上市，在2012年初畀現大股東華成要約全購後先改為前名「香港珠寶」，單刁華成嘅FA係潘蘇通嘅高銀融資、獨立股東之獨立財務顧問係大有融資，都算係有料。當時每股以0.2045港要約，大股東已向舊主買入55.57%股份，接納要約嘅股東有19.23%加埋已經74.8%，仲未計公眾股東入面有一個特別耀眼嘅持份者，長江實業（集團）有限公司持有14.11%，當年長江旗下匯網就同志鴻科技合組i21公司，向商業機構提供「網上應用軟件服務」（ASP），匯網持62.5%而志鴻持37.5%股權。至於之後嘅要約，不排除長江有份在當中牽線，因為長江在要約完成後並沒有減持股份，現大股東莊儒平成班兄弟姊妹都係姓莊的，誠哥老婆又係姓莊，難道係巧合？要約完成後大股東配咗14.37%出去，假定佢係人頭戶口持有先，就睇當時股權分布隻股票都非常乾身，街外公眾股東都係得10.63%。其後嘅財技活動都有唔少，先喺2013年做了一次一般授權擴大股本配股14.59%，因為係無折讓配股，所以人頭戶接貨嫌疑較大，就喺呢次配股長江持股量被攤薄至12.05%，不過大股東依然持大量股權在手，適逢公司近月又再做一次一般授權配股動作，而且集資額係好細的，通常集資額細嘅配股，後續炒作都非常強勁有力，不過股份大升到0.203元就停牌了，大家可以等復牌後走勢對版先再追入都唔遲。由於篇幅所限，下回再詳細分析。
【權益披露：本人持有御德國際控股股份】
Facebook 專頁：財技戲法
