作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。Facebook專頁：財技戲法
同得仕賣殼已是板上釘釘（二）
之前筆者寫過一篇同得仕賣殼已是板上釘釘，因為正準備賣走最後嗰舊肉，公告上寫明潛在買方已向由公司及潛在買方共同控制下的銀行帳戶支付可退還誠意金人民幣1,000萬元，在支付誠意金後，將有權享有20天的排他期。倘於盡職調查過程中潛在買方未發現任何重大問題，則初始排他期將延長25天以協商正 式買賣協議。經雙方同意後，可進一步延長排他期。計番個時間即係20天排他期再加25天延長時間，如果無意外或者雙方都唔再延期的話，本月26日就會出一份正式買賣協議公告。同得仕（集團）（00518）股價開始有輕微向上至最高0.64元，最近有5天的股份回購動作，總計公司回購了33萬股，而平均價為0.5388元，所以大家見到版面上買算最少都有0.53元，筆者認為呢個平均回購價都有少少參考作用，如果價錢不是相差太遠，相對值博率都係幾高的。
MOS House賣唔成遲早都要炒
大市由近期高位一直跌到而家都差唔多有4000點，大家可以隨時都搵到平貨，市值低於3億元的主板上市公司可以話一地都係，真真正正賤物鬥窮人。就好似2003年香港沙士樓價係超平，但係大家都無錢買或者唔敢買，但當最艱難嘅時期過咗嘅時候就會大呻一句早知就點點點啦。有好多主板細股都係股權集中，擺到明啤殼上市，但係好多朋友都係驚買咗甩唔到，因為等錢用時沽唔到真係慘過輸錢。就好似一隻半新股MOS House Group Ltd（01653）現價0.079元，市值只有區區1.58億元，公司淨資產8,800萬左右其實可以不理，因為公司係賣瓷磚的，存貨已佔7,500萬，雖然殼價已經跌好多，但始終都有一定價值喺度，因為老闆養住隻殼都要成本，賣唔成遲早都要炒。
【利申：筆者沒持有以上股份】
