作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。Facebook專頁：財技戲法
悶到就快被遺忘的大茶飯
筆者首次喺呢度同大家見面，多多指教！
近幾個交易日大市成交都係嚴重偏低，最好就梗係留意番啲之前有大動作，又悶到差點被市場遺忘嘅公司。
今期推介嘅公司就係香港國際建設（00687），公司現市值為45.78億元，之前大股東海航集團將69.54%股權以每股3元出售予黑石集團，本身黑石一致行動人士持1.93%，成事後持股71.47%。最有趣嘅地方係，再對上一手的大股東是黑石集團，即係話黑石當年2013年尾以2.86元買下，2016年以每股4.53元轉售給海航集團，現在海航再將公司以每股3元賣返畀黑石，當然以前已發行股數同依家已經係有天淵之別啦。因為之前公司賣咗幾塊啟德地皮，買家為「恒地」及「會德豐」，於是有大量現金入帳，所以較早前公司宣布派發特別息1.48元（已在6月17日除淨），最大股東黑石現持有75%股權，其實因為要恢復公眾持股量的25%，所以要配返之前全購多收番來的股數出去畀兩名獨立第三方，筆者相信都係友好持有。就咁睇現價1.36元就當加埋除淨嘅息上去，都係得2.84元，依家賣畀黑石成本再低啲；派息完成後公司建議改名，仲要係一模一樣改番之前做地基個名泰昇集團，到時公司股價應該會再展升浪。
如果再唔放心，大家可以入去CCASS睇下，紙股票加上頭十間行持股量高達98.7%，所以筆者認為呢啲位買，只有坐唔會錯。
【筆者沒持有以上股份】
