作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。Facebook專頁：財技戲法
已賣了的主板期殼
隨住監管機構對上市收緊監管後，「啤殼」上市已經唔係好似以前咁容易，幾年前主板殼叫價仲可以6、7億元，「啤殼」就係一門穩賺不賠嘅生意，但而家殼價大跌，主板出面叫緊3億元，創業板幾乎零殼價（即是無人要），甚至乎筆者聽過一間2億市值嘅主板上市公司按殼7成股權借3,000萬都唔肯借，其實照睇條件係荀到無朋友，3,000萬不斷收高息，借方還唔到錢就食咗隻殼；問題係要有買家先得，假設出面無買家，基本上就係「拿屎上身」，因為養住隻殼要嘥時間、精神，分分鐘搞唔掂仲會有被DQ嘅風險。自百威亞太縮沙後，睇番數據顯示，近兩個月都係一間上市申請都無，可以話就快慘到要食蕉皮。
大市成交每日只有600餘億元，基本上大戶機構投資者已佔大部分，靠佣金生存的經紀除非本身碼住幾個大客叫做有啲「TURN」之外，如果唔係多數都係食屎，因為傾刁活動在呢兩個月都幾乎絕迹， 1、2、4、9牌嘅券商叫價得番幾球錢，無新IPO上市搞到平時砌人頭嘅外快都無得搵，問題唔係淨係一個半個無得搵錢，而家係成個行業停哂。
有危就有機，筆者收到風K2 F&B HOLDINGS LIMITED（02108）以期殼方式賣了，作價都仲有幾億元，呢間公司今年3月6日上市，由上市至今只有接近5個月時間，當時招股價為0.75元，第一日開市上過0.9元之後就一直跟劇本下跌，因為期殼價只有差不多招股價的一半，所以無必要頂住個價喺高位，加上圍番來啲飛畀番差額佢地就得。現價只有0.235元，距離期殼價絕對係有好大折讓，新主買番來都唔會淨係想收回成本吧。
【利申：筆者沒持有以上股份】
