P2 財技掩眼法
作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
=======================
題目：日清食品潛力無限
之前有講過嘅日清食品（01475）都可負所望由6.19元踢到上最高7.22元，依家只係有少少回吐至6.85元，筆者認為可以長Keep，香港上市的日清食品主要業務在香港和中國大陸市場，香港嚟講絕對係深入民心，有出前一丁系列之餘又有合味道品牌，兩款麵質唔同但各有千秋，上年香港分部嘅業務收入仲要有增長，唔講唔知原來集團收入有差唔多44%係香港佔比，其餘都係來自中國大陸。或者咁講，公司近一年全年收入係2,998萬元，即係只有1,675萬係來自中國大陸，咁大個地方收入只有千多萬，可以話潛在增長空間係非常之大的，要數中國即食麵行業龍頭就一定係康師傅（00322），銷量銷額都市佔40幾個%，其次就係統一企業（00220），不過統一唔算係主要做即食麵，佢嘅「滿漢大餐」算係做得非常出色。
日清食品同康師傅、統一企業一樣，都唔係淨做即食麵生意都有涉足飲品市場，康師傅飲品業務都係市佔第一，有碳酸飲料、即飲茶、包裝水咖啡飲料、功能飲料、乳酸菌飲料應有盡有；統一有自家茶類飲品同埋果汁飲品，仲有咖啡、奶茶、豆奶，非常多元化；日清食品都似乎摸索緊呢個方向發展，就公司與Kagome Co., Ltd.的合營業務而言，其業務擴展順利，並已融入至現有的業務組合。年內，「Kagome」品牌旗下的新口味蔬果汁Setouchi Mandarin Mixed Juice、Apple Mixed Juice 及Ehime Kiwi Mixed Juice已在超市、便利店及一些特選商戶推出。公司已經開始於中國分銷「Kagome」蔬菜及果汁，以擴大即食麵產品以外的收入來源。另外日清母公司研發人造肉，大家都知道人造肉嘅公司Beyond Meat股價升得幾犀利，如果日清撈埋人造肉將會前途同埋錢途都無可限量。
筆者沒持有以上股份
Facebook專頁：財技戲法
