P5 財技戲法【股價圖：贛鋒鋰業（01772）】
【加贊助商至12月31日瑞邦證券】
作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：贛鋒鋰業可以短炒
英皇娛樂酒店（00296）推介完之後由1.49元微升近4%至1.55元收市，但筆者貪佢資產多又無咩大負債，目標長線睇佢有2.5至元價值，每年又有穩定五厘幾股息收，最重要係依家keep住日日都有回購，公司大把現金，所以睇佢個款都係會用盡每年回購上限10%，唔好睇少呢10%，因為街貨已經無乜，除時會揸乾晒手花，坐得嘅朋友不妨買來當儲錢。
依家啲新股好似開始暢旺番，基本上隻隻開得都有幾十%升幅，筆者有行家朋友講開一隻傲迪瑪汽車（08418）上市價0.24元打到最高位2.79元，上市後收齊晒啲飛就怒踢上去，剛剛又有一隻國際永勝（08441）22日上市，暗盤收市0.52元，較招股價大升62.5%，呢間嘢集資額又細，預期上市當日都係炒到飛天。
揀穩陣短炒股
筆者在另一篇文章都有提過，依家買股票做短炒唔係唔得，但穩陣起見都係揀啲平均每日有500萬或以上成交嘅公司，因為每日五球成交額即係一個月都有一億「Turn」，就當佢全部做假成本都唔平，起碼背後老闆條水喉夠粗先嘛！筆者有位客人個投資組合有一間公司贛鋒鋰業（01772）自己都好鐘意。呢間公司去年10月11日上市，當時招股價為16.5元，公司的主要業務為：深加工鋰產品、鋰電新材料系列產品、鋰電池及儲能電池等的研發、生產和銷售、鋰資源、鋰電池回收等。以業務嚟講唔算有咩驚喜，但收入勝在夠穩定，公司有七個生產基地同埋擁有全球包括鋰輝石礦及含鋰鹵水的六個優質鋰資源的股權，除此之外公司有鋰電池與電池回收業務，固態鋰電池業務係公司電池業務板塊發展嘅其中一個重點，加上公司通過擴充鋰電池回收業務產能及發展回收及再利用廢舊電池的專長，繼續向下游拓展業務。股價方面，呢間公司最近一個月都有近2元波幅，除9月做過最低位8.2元之後，一直積極踢返個股價上去同時，又keep住有近1,000萬成交，加上去年派息都有近2厘幾，算係不過不失。
呢個星期筆者約咗一間上市公司飛揚集團（01901）嘅管理層見面，聽聞呢間公司每年都有20至30%增長，睇番佢現價0.99元只係4.95億元市值，細細隻睇下佢有咩特別嘢搞就update大家。
Facebook專頁：財技戲法
【權益披露：本人沒持有上述股份】
