P5 財技戲法【股價圖：BC科技集團（00863）】
【加贊助商至12月31日瑞邦證券】
作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：擁有強勁後台嘅區塊鏈概念股
大市本周曾經重上27,000點，筆者幾時都話有危必有機，正如毒草旁邊多數會有解藥；一個人落難時唔排除會有艷遇，只係筆者從來未遇過而已。英皇娛樂酒店（00296）推介完一周左右由1.49元一直慢慢走上1.6元算係幾唔錯，又例如幾月前在1.29元水平都推介過隻泰昇集團（00687）計埋之前除息0.21元，實質依家已有1.61元了。股市就係咁，興奮完泡沫爆破，過一排寒冬之後，又乜都返晒嚟，天神村又回復平靜。
喺筆者寫文當日就大炒區塊鏈題材，話說習大大日前指出要加快區塊鏈技術發展，中國國家外匯管理局副局長陸磊稱，中國外匯局正尋求在跨境貿易融資同埋宏觀審慎監管中使用區塊鏈及人工智慧。消息一出成個板塊有區塊鏈概念嘅都大炒特炒，包括有雄岸科技（01647）、美圖公司（01357）、桐成控股（01611）、BC科技集團（00863）、麥迪森控股（08057）等，差不多隻隻都有百分之十幾至二十升幅，當中嘅BC科技筆者都重點推介過，前身叫品牌中國，在去年1月30日由要約人East Harvest以每股3.18元提全購，當時要約人由Wise Aloe、Colour Day及Smart Mission分別擁有60.42%、32.87%及6.71%權益。Wise Aloe由Bell Haven擁有89%權益，而Bell Haven由Lo Ken Bon先生（下稱Lo先生）擁有30.82%權益，高振順係Colour Day唯一擁有人，當時計要約完Bell Haven同高生會分別間接行使公司45%同埋24.48%投票權。先唔計高生，呢位Lo先生來頭都唔細，佢係區塊鏈解決方案供應商ANX International行政總裁，佢創辦ANX International之前，曾經喺多間公司（包括有BT Global Services、Verizon Business及Accenture）擔任高級管理層。至於十年磨一劍嘅高振順大名在殼股界應該無人不識了，早幾年前多隻數倍升幅股都有佢沾手，當中光啟科學（00439）由低位開始升了二十倍，阿里影業（01060）、歡喜傳媒（01003）等都有幾倍至十倍升幅。
最近披露權益顯示，大股東East Harvest持有65.92%，零零舍舍有一個7.05%嘅股東叫Eternity Investment Limited，呢間公司就係永恒策略（00764），原來BC科技喺5月27日做了一般授權印新股，同時永恒以每股5元認購了2,000萬股，永恒系同高生一直有有著一段好微妙嘅關係，當然呢次可能係幫手坐貨都唔定，睇個版面成交係超級疏落，今日隻隻都炒佢就keep住低調只升4.21%，以高生嘅無寶不落往績，唔通依家就係亮劍前嘅時機？
【權益披露：本人沒持有上述股份】
Facebook專頁：財技戲法
