P5 財技戲法【股價圖：贛鋒鋰業（01772）】
Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：年輕人大部分都唔捱得
現時好多年輕人話無機會、搵埋啲錢都唔夠買樓唔夠用，對香港政府有幾咁不滿。無錯，香港政府做得衰就係事實，就但有無撫心自問有無盡過自己最大努力？以前上一代好多都打幾份工肯去捱去搏，差唔多一早七點幾起身做到凌晨一至兩點先收工，自問自己有無咁嘅能耐先？無嘅話又怕蝕底憑咩話上一代人係「廢老」呢。
筆者最近聽一啲做餐飲嘅朋友講，因為呢幾個月社會運動有大量食肆結業，經濟不景氣下有唔少人見長工，因為朋友食肆係走年輕人、型格路線，所以見得嘅都係年輕一代，但二十個人見工有十二個係No Show，其他嗰八個入面有六個唔正常。就以個職位係返下午三點至凌晨一點，一開口就問可唔可以返下午五時至晚上十時？原因係佢驚起唔到身同埋晚上要約朋友去玩。第二個例子係兩個月後就會去澳洲Working Hoilday，問返咗兩個月之後，停一年返港，再考慮返唔返得唔得，大佬你連見長工定兼職都未分清楚點請你呀？剩番兩個係一個返咗一日，頂唔順返返下工消失咗，另一個係差唔多頂唔順，問你死未！想當年筆者做魔術學徒時，曾經試過每日做十小時，包括洗廁所、做跑腿、搬貨、買材料乜都做齊都係日薪一百蚊。
贛鋒鋰業疑似想入深港通
講番股票，睇個勢筆者之前推介過短炒的贛鋒鋰業（01772）似乎想入深港通名單，因為當時股價13.66元，兩個月不到已經踢高至19.24元，最高曾做過19.6元，以已發行股本計入深港通50億元市值，門檻為25元左右，筆者睇過佢每日成交量都係非常足夠，所以只差三成左右升幅話都唔難搞到。買咗嘅繼續持有，未買嘅讀者們可以等佢衝穿20元，搏佢再踢兩成半都夠爽皮啦！
本周無咩特別心水，唯一係另一個平台都有講過的星島（01105），做得報紙雜誌都唔係為錢，因為傳媒幾乎同「燒錢」兩字掛勾，賣出去止血都係人之常情，但做咗咁耐突然賣可能有政治因素都唔定，不過唔理啦，公司出咗《公司收購及合併守則》（「收購守則」）規則3.7及3.8，股價由10月初的0.8元踢上至現價1.42元收市，傳聞係會比現價再賣貴少少，呢間公司現金都有4億幾，睇番個資產淨值差不多每股有2元樓上，依家計仲有三成左右水位，讀者朋友可以小注博下，發個新年財。
【權益披露：本人沒持有上述股份】
Facebook專頁：財技戲法
