招財密碼
潘啟才（Phemey），測量師出身，試過輕輕鬆鬆年薪過百萬，亦試過胼手胝足地創業。後來發覺幫人做成生意最過癮，成功拉攏買賣雙方便穩袋幾百萬，至此「通天經紀」之名便不脛而走。眼光準、膽量大兼且身體力行，搞炒股投資班大賺一筆之餘，亦計劃大搞創業班，矢言教授云云打工仔、待業青年、大學生無本生利，財來八方的本事。
王兟先生的「明日大嶼」計劃
一年幾前，林鄭話要搞個「明日大嶼」來解決土地問題，這個理想就好美好，但係做落就好難，因為這個要用幾千億，又因為撞正疫情，政府庫房錢已經派哂出去，搞到依家款都未撥到出去，都唔知點算。
點知最近，有個叫王兟（讀音:新）嘅人就提出了一個方法，話可以解決呢個問題。先講吓呢個王兟是誰，原本我以為佢只係政府唔知喺邊間大學搵返黎嘅學者。點知佢原來大有來頭，竟然係李嘉誠的愛將，TOM集團前CEO。而佢嘅方法就叫「創新公私營合作」。
「創新公私營合作」是甚麼？簡單講，即係眾籌。由全港750萬市民合資擁有一間公司，共同完成「明日大嶼」。王兟建議，政府在市場上以股權同債劵籌1.1萬億元，其中75%股權由每位市民持有，即以認股權證形式免費派發，一人一股。另外25%股權就由一間私營基金公司向外界籌集，好似新股上市搵基石投資者咁，咁就可以解決「明日大嶼」嘅資金問題。
本來我覺得，政府班高官成日覺得納稅人嘅錢唔係自己，肯定又拎去亂使，搞到個工程又超支。但呢次又唔同講法，因為我諗起投資大師PETER LYNCH一句: Whatever the queen is selling, buy it. 佢嘅原因係，政府唔會想買了政府賣嘅股票嘅市民蝕錢，因為咁樣太肉酸，政府亦會比市民罵。所以，政府往往會令市民有水位賺吓，Ibond係咁，領匯都係咁，有幾可買政府出嘅產品會蝕錢？
眾所周知，香港嘅土地超級值錢，政府起完「明日大嶼」，高價賣地出去，根本無得輸。所以我覺得王兟呢個計劃有得諗。
