招財密碼
潘啟才（Phemey），測量師出身，試過輕輕鬆鬆年薪過百萬，亦試過胼手胝足地創業。後來發覺幫人做成生意最過癮，成功拉攏買賣雙方便穩袋幾百萬，至此「通天經紀」之名便不脛而走。眼光準、膽量大兼且身體力行，搞炒股投資班大賺一筆之餘，亦計劃大搞創業班，矢言教授云云打工仔、待業青年、大學生無本生利，財來八方的本事。
【標題】山東鳳祥值得留意
今日要介紹呢隻山東鳳祥股份有限公司（09977），今年7月16日上市。是一間主要從事養雞、牲口屠宰，以及生產及銷售雞肉製品業務的公司。 呢隻股自上市以來表現其實一般，當時以下限招股價3.33元上市，浮浮沉沉，短暫升過上4元後，好快又插水，最低趺到2.13元，少左一截。最近先升番上招股價水平，PE都係5倍左右。
點解會咁樣呢?皆因其收入好容易受雞苗價格影響而大幅波動，加上業務主要是上游加工，同消費者之間中間隔左多重關卡，缺乏自家品牌，導致估值偏低。另外，當時山東鳳祥的財政狀況亦不太樂觀，2016-2018年，山東鳳祥的資本負債比率分別為111%、127.9%、104.2%，連續三年資不抵債，直至2019年，才下降到60.4%，欠落出面唔少街數，所以股價搞咁耐都冇咩起色。但呢排山東鳳祥形勢就開始扭轉，首先在雞苗價格方面，中國白羽雞苗價格自11月初開啟「瘋漲」，短短12天暴漲156%，而近日，歐洲禽流感疫情爆發後持續擴散，加大中國雞苗短缺，令相關行業有望受益。
跟住在銷售方面，山東鳳祥在零售市場上開始有顯著的進步，新零售業務實現銷售收入約人民幣2億元，同比增長132.6%。反映呢間公司有能力自行在市場上銷售產品，可以擺脫經銷商的層層剝削，有助提高競爭力同估值。
另一個要留意的地方就係呢隻股的股權有異動，招銀國際證券在這個星期也大幅增加。反映有大量轉倉活動在這兩個星期出現，而山東鳳祥的股價亦在這兩個星期升左唔少，好可能正是炒上去的時機，大家可以密切留意。
